(enrico.sierra80@yahoo.it) – L’annu vecchiu sind’è sciutu fra ucculi, musica, botti e fuechi. Quantu vinu, quanti panittuni, quanti spumanti pi salutari n’annu ca si ndì vai, e n’annu ca trasi. Ndà mù cacciatu l’annu vecchiu, pircè no ndè piaciutu. Mò vitimu cce faci l’annu nuevu!
L’annu vecchiu iu l’aggiu vistu, mentri si ndì scia, era tuttu ncazzatu e gritava: “Vi la sta pigghiati cu mei pircè no aviti avutu quiddu ca vuliuvu, e nno vaggiu piaciutu, e mi sta gridati detru. Ma lu vuliti capiti, ca la colpa eti vostra?
Ci eti ca mena li bombi,ci eti ca cciti li cristiani, li piccinni, li femmini, li mammi, ci s’imbriaca e ci si droga, ci robba? E quandu vui vi buffati ci eti ca faci muriri quiddi ca no tennu mancu nu stuezzu ti pani? E vui iaticati lu beni di Diu e pinzati sulu a vui. No sontu iu, ma siti vui.
Dati na manu a nnu piccinnu ca voli ttraversa la strada, iutati quiddi ca hannu bisuegnu ti nu cappottu pi mbucciarsi quandu faci friddu, iutati ci no poti camminare, e poi no viditi a casa di li atri, uardati puru a casa vostra.
La colpa ci l’annu vecchiu nò v’è piaciutu non è mia, io agghiu pruvatu cu vi cuntentu, ma vui ommini piccinni nò aviti vulutu.
Pigghiativi stritti stritti li mitoddi intr’alli mani e pinzati!
Discitativi, dativi na mossa, crisciti, pircè… si no…. ogn’annu stamu a sintiri sempri li stessi cosi.
Crisci, crisci e fatti homo.”
